ពិធីចុះហត្ថលេខានេះធ្វើឡើងក្រោមវត្តមានដោយលោកស្រី ស៊ុំ ស៊ីផា អគ្គនាយកក្រុមហ៊ុន ផុស្ការ ឌីជីធល ឯ.ក (Chief Executive Officer) និងលោក Raymond Sia Say Gaun អគ្គនាយកធនាគារ កាណាឌីយ៉ា (Chief Executive Officer) ដែលមានទីតាំងនៅអគារកាណាឌីយ៉ា។
លើកឡើងនាឱកាសនោះលោកស្រី ស៊ុំ ស៊ីផា បានឱ្យដឹងថា Poscar Digital និងធនាគារកាណាឌីយ៉ា បានក្លាយជាដៃគូយុទ្ធសាស្ត្រជាផ្លូវការ ហើយតាមរយៈកិច្ចសហការនេះយើងកំពុងបន្ថែមតម្លៃបន្ថែមទៀតដល់សង្គម និងភាពជាដៃគូរបស់យើង។ ការសហប្រតិបត្តិការនេះដើម្បីគាំទ្រ និងកែលម្អរបាយការណ៍ហិរញ្ញវត្ថុឌីជីថលសម្រាប់សហគ្រាសធុនតូច និងមធ្យម (SME) ការតភ្ជាប់ការទូទាត់តាមឌីជីថល និងកិច្ចសហការនាពេលអនាគតបន្ថែមទៀត។
លោកស្រី ស៊ុំ ស៊ីផា បានបន្តទៀតថា កិច្ចសហប្រតិបត្តិការនេះនឹងក្លាយជា ភាពជាដៃគូឆ្ពោះទៅរកផលិតផលមួយរបស់ Poscar Digital ដែលត្រូវបានគេស្គាល់ថា Vithean ។ Vithean គឺជាប្រព័ន្ធគណនេយ្យអនឡាញដែលទើបបង្កើតថ្មីដែលផ្តួចផ្តើមដោយ Poscar Digital ជាមួយនឹងសេវាកម្មគណនេយ្យអនឡាញ និងបទពិសោធន៍សំខាន់ៗដែលយើងប្តេជ្ញាបង្កើតភាពវិជ្ជមានដល់សហគ្រាសធុនតូច និងមធ្យមនៅកម្ពុជា តាមរយៈគម្រូ platform របស់ Vithean ដែលមានឧបករណ៍គ្រប់គ្រងហិរញ្ញវត្ថុ និងផែនហិរញ្ញវត្ថុកម្រិតខ្ពស់បែបវិជ្ជាជីវ។
លោកស្រី បានបន្ថែមថា Poscar Digital និងធនាគារកាណាឌីយ៉ា អាចមើលឃើញសក្តានុពលដ៏សំខាន់នៃការសហការគ្នា ដើម្បីផលប្រយោជន៍ទៅវិញទៅមក។ ក្នុងន័យនេះ Poscar Digital និងធនាគារកាណាឌីយ៉ា ទន្ទឹងរង់ចាំពង្រឹងទំនាក់ទំនងដ៏រឹងមាំមួយ ដើម្បីកសាងវេទិកាឌីជីថលប្រកបដោយភាពច្នៃប្រឌិតសម្រាប់សហគ្រាសធុនតូច និងមធ្យម និងប្រព័ន្ធ ecosystem ឱ្យកាន់តែប្រសើរឡើង។
គួរជម្រាបថា «Vithean» គឺជាប្រព័ន្ធគណនេយ្យបែបឌីជីថលថ្មីមួយ ផ្ដួចផ្ដើមឡើងដោយ ផុស្ការ ឌីជីថល ដែលជាក្រុមហ៊ុនចុះបញ្ជីស្របច្បាប់សម្បូរធនធានជំនាញផ្នែកព័ត៌មានវិទ្យា និងបទពិសោធន៍ប្រតិបត្តិការជាក់ស្ដែង និង អេហ្វអាយអាយ& អឺសូស៊ីអេត បានផ្ដល់នូវសេវាកម្មបញ្ជីការគណនេយ្យ និងបច្ចេកទេស គណនេយ្យដល់អតិថិជនជាង ២០ឆ្នាំមកហើយនៅក្នុងទីផ្សារអាជីវកម្ម។
ឆ្លៀតក្នុងឱកាសនេះដែរដើម្បីអបអរភាពជាដៃគូនេះ ក្រុមហ៊ុន ផុស្ការ ឌីជីធល ឯ.ក នឹងផ្តល់ជូននូវប្រូម៉ូសិនពិសេសទៅដល់អតិថិជន ដែលជាវនូវកញ្ចប់ណាមួយរបស់កម្មវិធីប្រព័ន្ធគ្រប់គ្រងគណនេយ្យ វិធាន នឹងទទួលបានការថែមជូនរយៈពេលនៃការប្រើប្រាស់ ៦ខែ ដោយឥតគិតថ្លៃ សម្រាប់អតិថិជនដែលជាសមាជិក របស់ធនាគារកាណាឌីយ៉ា៕
